بتقولّي إنسي
بتقولّي نمشي
بتقولّي روح ؟!!
::
لو الزمن ينسي لنسينا
لو الليل يسرق أسامينا
ونصحي الصبح نلاقينا بلا مرسي ولا مينا
::
لو الأرض تنسي خطاوينا
والبحر ينسي حكاوينا
كنا بسهوله مشينا
::
لكن
::
لكن حبيبتي كل همسك فيّا باقي
كل كلمه قولتهالي
كل تعريف ليكِ عني
كل آه وكل جرح فيكِ مني
وكل غلطه غفرتهالي ... حتي
::
حتي
::
إن عمري فيكِ ضايع
إن جوه وريدك لنبضي سامع
::
ولسه
::
لسه حلمي منك ما أتولدش
لسه رغم كل النار الحلاوه ما أستوتش
::
ومامتش
::
مامتش بطل الحكايه
والحرب ما انتهتش
أيوه يا وطني وكياني
ما أنتهتش
أيوه يا حصني وملاذي
عشان ما متش
::
رغم
::
ألف طعنه وألف جرح
ألف سهم في قلبه شق
لأ ما متش
::
والنهايه؟!!
لأ ما جتش.
ليست هناك تعليقات:
إرسال تعليق