حدوته
مره واحده كانت بتحب نمر.. بس كانت خايفه منه لياكلها
وبعدين قالت انا هروضه وهخليه ياكل فاكهه بدل اللحمه
وبكده مش هيكلني
وفعلاً نجحت انها تخليه يكره اللحمه ويحب الفاكهه
واول مره يرفض ياكل لحمه ويبدأ ياكل فاكهه أكلها هي
أصلها كانت حطه برفان بريحة الخوخ
::
::
حدوته2
كان محكوم عليها بالإعدام وهو جابلها البراءة - هي افتكرت كده-
أخدها معاه بيته وجابلها لبس كتيررررر كله لونه أحمر
فقالتله بس اللبس الأحمر بيفكرني بـ
قطع كلامها وقالها.. وهو إيه إتغير؟؟ .. انا ما طلعتكيش براءة أنا بس غيرت جهة تنفيذ الحكم
::
::
حدوته 3
كانت فقيره وهزيله..كانت عاوزه تحلم..قالولها إحلمي علي قدك
حلمت..
ولما حلمها اتحقق..
قالولها رخيصه
راحت وبصت علي نفسها في المرايه ( لسه فقيره وهزيلة) ..
ضحكت وقالت..علي قدي
::
::
حدوته 4
كانت ساكنه رصيف الشوارع بتحلم بأربع جدران
جه ..قرب منها وقالها تعالي هطلعك سلم
فرحت ..و طلعت معاه
وفضلت تطلع وتطلع ولما تعبت سألته قالتله هو احنا هنوصل الشقه امتي
قالها مين قال ان فيه شقه
هو كل سلم لازم يبئا أخره شقه
إحمدي ربنا إن في حياتك طلعتي سلم
:::
:::
وتوته توته فرغت الحدوته
ليست هناك تعليقات:
إرسال تعليق